شهادة فتاة تحرش بها عامل بمحل ملابس بالمعادي

قامت مبادرة "شُفت تحرش"، بنشر شهادة فتاة تعرضت للتحرش في أحد نوادى المعادى وتم التعامل مع المتحرش.

محل بنيشتى (BeNeshty) فرع المعادي في دجلة 
اللى حصل بالظبط وربنا يشهد على اللي هيتقال ده، إن أختى التوءم راحت تشترى بنطلون جينز جديد من المحل ده، دخلت المحل واختارت بنطلون ودخلت عشان تقيسه، والولد البياع اللى في المحل اسمه صموئيل، قفل ورا أختى الستارة على أساس إنها تدخل تقيس البنطلون، غلطتها إنها متأكدتش إنه قفل الستارة وراها كويس، وهي بتبتدى تقلع البنطلون عشان تقيس التانى، خدت بالها إن الولد اللى اسمه صموئيل ده واقف يبص عليها من جنب مفتوح في الستارة هو سابه قصد عشان يشوفها منه.. طبعا هي اتخضت والحمد لله إنها ماكنتش قلعت البنطلون، راحت خارجة من البروفة ومتكلمتش معاه، طلبت من الولد التانى إنه يديها رقم صاحب المحل، أخدت الرقم واتصلت بالمدير اسمه مينا، قالها بالحرف الواحد إنه مش حيقدر يعملها حاجة وميقدرش يقطع عيش الولد، وكان مكدبها أصلا!!! لما قفلت التليفون معاه انهارت من العياط، وفي الوقت ده الولد هرب وهي مش واخدة بالها.

بعد كده إحنا رحنالها وخطيبها وصحابها، وكلمنا صاحب المحل قلناله ييجى أو يبعتلنا الولد، الراجل صاحب المحل جه وقعد يتكلم معانا وبعد مشفنا متعصبين ومصممين ناخد حقها، قالنا إنه حيرفده وحيتصل بيه يرجع عشان يتأسفلها، بس هي كانت مصممة إنه يتعمله محضر تحرش.. المهم الولد ده جه وقعد يتأسف، وده يدل إنه فعلا بص عليها!!! الولد قعد يستفز في الناس والرجالة اللى كانت واقفة لحد ما ضربوه، وطبعا ساعتها مكنش ينفع إن إحنا نروح نعمل محضر!!

كل اللى أنا طالباه من الناس إنهم لو شافوا الولد ده اللى اسمه صموئيل في أي فرع من فروع المحل ده، ميسكوتوش لأن الموضوع بيبدأ بنظرة وبعد كده ممكن لا قدر الله يوصل لاغتصاب لو جتله فرصة!!